हॅलो कृषी ऑनलाईन । कडकनाथ कोंबडी (Kadaknath Chicken) ही मध्य प्रदेशातील झाबुआ येथील एक जात आहे. भारत सरकारने झाबुआचा कडकनाथ या नावाचा GI टॅग दिला आहे. कडकनाथ कोंबडीचे सर्वात मोठे वैशिष्ट्य म्हणजे तिचं मांसाचा, रक्ताचा आणि पंखांचा रंगही काळा असतो. याशिवाय या कोंबडीचे हाडही काळे असते. त्यात देशी चिकनपेक्षा जास्त आयर्न आणि प्रोटीन असते. सध्या मध्य प्रदेशात निवडणुकीचे बिगुल वाजले आहे. सर्वच उमेदवार आपापल्या विधानसभेत विजय मिळवण्यासाठी जोरदार प्रचार करत आहेत. त्याचबरोबर इतर राज्यातील नेतेही उमेदवाराच्या समर्थनार्थ येऊन प्रचार करत आहेत. पण, निवडणुकीच्या प्रचारादरम्यान, दुकानदार आणि ढाबा मालकांच्या कमाईतही वाढ झाली आहे, कारण कडकनाथ चिकनची मागणी लक्षणीय वाढली आहे. त्यामुळे त्याची किंमतही पूर्वीच्या तुलनेत दुप्पट झाली आहे.
झाबुआ जिल्ह्यातील जगप्रसिद्ध कडकनाथ कोंबडी, जी इतर दिवसात 750 रुपये प्रति नग विकली जात होता, तिची किंमत आता 1500 ते 2000 रुपये झाली आहे. असे असतानाही कडकनाथ खरेदीसाठी दुकानांवर ग्राहकांची गर्दी असते. याशिवाय परिसरातील ढाबेही समृद्ध झाले आहेत.
निवडणुकीच्या काळात असते मोठ्या प्रमाणात मागणी– (Kadaknath Chicken)
अचानक कडकनाथ कोंबडीच्या दरात वाढ झाल्याबद्दल स्थानिक दुकानदारांना विचारले असता, हिवाळ्यात विधानसभा निवडणुका आल्या की बाजारात कडकनाथ चिकनची मागणी वाढते. कडकनाथ विक्रेत्याने दिलेल्या माहितीनुसार, विधानसभा निवडणुकीच्या काळात इतर राज्यातून आणि जिल्ह्यातून मोठ्या प्रमाणात लोक निवडणूक प्रचारासाठी येतात. येथे या लोकांची खाद्यपदार्थांची पहिली पसंती कडकनाथ आहे. त्यामुळे निवडणुकीच्या काळात मागणी वाढल्याने कडकनाथच्या किमतीत वाढ होते. झाबुआ जिल्ह्यातील एक कोंबडी विक्रेता यामीन सांगतो की, प्रत्येक वेळी तो विधानसभा निवडणुकीच्या ५- ६ महिने आधी कडकनाथच्या पिल्लांचे संगोपन सुरू करतो, जेणेकरून निवडणूक प्रचारादरम्यान त्याला जास्तीत जास्त नफा मिळू शकेल.
राजकीय पक्षांचे लोक काय म्हणतात?
आम आदमी पक्षाचे जिल्हाध्यक्ष कमलेश म्हणतात की, प्रत्येक वेळी निवडणुकीच्या वर्षात कडकनाथ कोंबड्या (Kadaknath Chicken) महाग होतात, पण हे चांगले आहे. किमान कडकनाथचा व्यवसाय करणाऱ्या आमच्या आदिवासी बांधवांना तरी फायदा होत आहे. तसेच भाजप नेते दौलत भावसार यांनीही कडकनाथ ही झाबुआची ओळख असल्याचे म्हटले आहे. निवडणुकीच्या काळात स्थानिक कडकनाथ विक्रेत्यांना या ओळखीचा फायदा होत असेल तर चांगली गोष्ट आहे.
शरीराची प्रतिकारशक्ती वाढते
झाबुआ येथील कृषी विज्ञान केंद्राचे शास्त्रज्ञ डॉ. चंदन राय सांगतात की कडकनाथचा रंग काळा आहे कारण त्यात अतिरिक्त लोह आणि मेलेनिन आढळतात. कडकनाथ कोंबडीच्या सेवनाने शरीराची प्रतिकारशक्ती वाढते, असे डॉ.राय सांगतात.
