हॅलो कृषी ऑनलाईन । खासगीरीत्या व्यावसायिक कुक्कुटपालन करणारे शेतकरी तसेच कुक्कुट व्यवसाय करणाऱ्या कंपन्या यांना कुक्कुटपालन व्यवसाय करताना येणाऱ्या अडचणीवर उपाययोजना करण्यासाठी राज्यस्तरीय कुक्कुट समन्वय समितीचे गठन करण्यात आली असून या समितीच्या माध्यमातून कुक्कुटपालन व्यवसायाला (Poultry Business) गती देण्यासाठी महाराष्ट्र सरकार प्रयत्नशील आहे अशी माहिती भाजप नेते आणि राज्याचे महसूल पशुसंवर्धन व दुग्धव्यवसाय विकास मंत्री राधाकृष्ण विखे पाटील यांनी दिली.
मुंबईतील सह्याद्री अतिथीगृह येथे नुकतीच राज्यस्तरीय कुक्कुट समन्वय समितीची बैठक झाली. त्यावेळी मंत्री श्री. विखे पाटील बोलत होते. यावेळी पशुसंवर्धन व दुग्धव्यवसाय विकास विभागाचे सचिव तुकाराम मुंडे, पशुसंवर्धन आयुक्त डॉ. हेमंत वसेकर, समन्वय समितीचे सदस्य आणि खासगी संस्थांचे प्रतिनिधी उपस्थित होते. यावेळी बोलताना विखे पाटील यांनी कुक्कुटपालनाबाबत वरील ग्वाही दिली.
कुक्कुटपालन व्यवसायाबद्दल विखे पाटील काय म्हणाले- Poultry Business
यावेळी मंत्री श्री. विखे पाटील म्हणाले की, समितीच्या कार्यकक्षेनुसार खासगीरीत्या व्यावसायिक कुक्कुटपालन करणारे शेतकरी तसेच कुक्कुट व्यवसाय करणाऱ्या कंपन्यांना येणाऱ्या अडचणीच्या संदर्भात शासनाच्या विविध विभागांशी आवश्यक त्या शिफारशी केल्या आहेत. ऊर्जा, ग्राम विकास, शालेय शिक्षण आदी विभागांना प्रस्ताव पाठविला आहे. समन्वय समितीमार्फत कुक्कुटपालन व्यवसायाला (Poultry Business) चालना देण्यासाठी शासनस्तरावर व खासगीरीत्या संयुक्तपणे प्रयत्न करण्यात येत असल्याचे मंत्री श्री. विखे पाटील यांनी या वेळी सांगितले.
