हॅलो कृषी ऑनलाईन: या आठवड्यात रब्बी पिकांची (Rabi Crops) काळजी घेण्याबाबत वसंतराव नाईक कृषी विद्यापीठाने महत्त्वपूर्ण हवामान आधारित कृषी सल्ला दिलेला आहे. रब्बी पिकांची या आठवड्यात कशी काळजी घ्यावी याबाबत जाणून घेऊ या .
हरभरा पिकास आवश्यकतेनुसार तुषार सिंचन पद्धतीने पाणी द्यावे. पिकात पाणी साचणार नाही याची काळजी घ्यावी. हरभरा पिकात घाटे अळीचा प्रादुर्भाव दिसून येत असल्यास त्याच्या व्यवस्थापनासाठी शेतामध्ये इंग्रजी T आकाराचे प्रति एकर 20 पक्षी थांबे लावावेत व घाटे अळीच्या सर्वेक्षणासाठी प्रति एकरी 2 कामगंध सापळे लावावेत. रब्बी हरभरा पिकात (Rabi Crops) घाटे अळीच्या व्यवस्थापनासाठी 5% (एनएसकेई) निंबोळी अर्क किंवा क्विनॉलफॉस 25% ईसी 20 मिली किंवा इमामेक्टीन बेन्झोएट 5% 4.5 ग्रॅम प्रति 10 लिटर पाण्यात मिसळून फवारणी करावी.
करडई पिकास आवश्यकतेनुसार तुषार सिंचन पद्धतीने पाणी द्यावे. करडई पिकात (Rabi Crops) माव्याचा प्रादुर्भाव दिसून येत असल्यास त्याच्या व्यवस्थापनासाठी डायमिथोएट 30% 13 मिली किंवा अॅसिफेट 75% 10 ग्रॅम प्रति 10 लिटर पाण्यात मिसळून फवारणी करावी.
पूर्व हंगामी ऊसाची लागवड करून सहा ते आठ आठवडे झाले असल्यास 260 किलो युरिया प्रति हेक्टरी देऊन पाणी द्यावे. ऊस पिकावर खोड किडीचा प्रादूर्भाव दिसून आल्यास याच्या व्यवस्थापनासाठी क्लोरपायरीफॉस 20 % 25 मिली किंवा क्लोरॅट्रानोलीप्रोल 18.5% 4 मिली प्रति 10 लिटर पाण्यात मिसळून फवारणी करावी.
ऊस पिकात खोडवा व्यवस्थापनासाठी ऊस पिकाची तोडणी झाल्यानंतर शेतातील पाचट जाळू नये. हळद पिकास आवश्यकतेनुसार पाणी द्यावे.
हळद पिकात कंदमाशीचा प्रादुर्भाव दिसून येत असल्यास व्यवस्थापनासाठी 15 दिवसांच्या अंतराने क्विनालफॉस 25% 20 मिली किंवा डायमिथोएट 30 % 15 मिली प्रति 10 लिटर पाण्यात मिसळून आलटून-पालटून फवारणी करावी. उघडे पडलेले कंद मातीने झाकून घ्यावेत. (हळद पिकावर केंद्रीय किटकनाशक मंडळातर्फे लेबल क्लेम नसल्यामुळे विद्यापीठ शिफारसीत संशोधनाचे निष्कर्ष दिले आहेत).
रब्बी हंगामात हळदीच्या (Rabi Crops) पानावरील ठिपके याच्या व्यवस्थापनासाठी अझोक्सिस्ट्रॅाबिन 18.2% + डायफेनकोनॅझोल 11.4% 10 मिली + 5 मिली स्टिकर प्रति 10 लिटर पाण्यात मिसळून फवारणी करावी.
फळबागा व्यवस्थापन (fruit Orchard Management)
- मृग बहार धरलेल्या संत्रा/मोसंबी बागेत फळ वाढीसाठी 15 ग्रॅम 00:00:50 प्रति लिटर पाण्यात मिसळून फवारणी करावी.
- आंबे बहार धरण्यासाठी मोसंबी बागेस (Rabi Crops) 500:500:500 ग्रॅम व संत्रा बागेस 400:400:400 ग्रॅम प्रति झाड नत्र:स्फुरद:पालाश खत मात्रा द्यावी व बागेस पाणी द्यावे.
- मृग बहार धरलेल्या लिंबूवर्गीय पिकांत कोळी किडींचा प्रादुर्भाव दिसून आल्यास याच्या व्यवस्थापनासाठी निंबोळी अर्क 5% किंवा ॲझाडिरेक्टीन (10 हजार पीपीएम) 3 ते 5 मिली प्रति लिटर याप्रमाणे फवारणी करावी. रासायनिक नियंत्रणासाठी डायकोफॉल 18.5 ईसी 2.7 मिली किंवा डायफेनथीयूरोन (50 डब्ल्यूपी) 2 ग्रॅम किंवा विद्राव्य गंधक 3 ग्रॅम प्रति लिटर पाण्यात मिसळून फवारणी करावी. आवश्यकता असल्यास दुसरी फवारणी 15 दिवसांच्या अंतराने करावी.
- डाळिंब बागेत आंबे बहाराच्या (Rabi Crops) नियोजनासाठी प्रति झाड 300:250:250 ग्रॅम नत्र:स्फुरद:पालाश खत मात्रा देऊन बागेस पाणी द्यावे. काढणी न केलेल्या व काढणीस तयार असलेल्या चिकू फळांची काढणी करावी.
रब्बी भाजीपाला पिके (Rabi Vegetable Crops)
रब्बी भाजीपाला पिकात (Rabi vegetable Crops) आंतरमशागतीची कामे करून तण नियंत्रण करावे. तयार असलेल्या भाजीपाला पिकांची काढणी करून घ्यावी.
मिरची पि‍कावरील फुलकिडींच्या व्यवस्थापनासाठी ॲसिटामेप्रिड 20% एसपी 100 ग्रॅम किंवा सायअँट्रानिलीप्रोल 10.26 ओडी 600 मिली किंवा इमामेक्टीन बेन्झोएट 5% एसजी 200 ग्रॅम प्रति 500 लिटर पाण्यात मिसळून फवारणी करावी.
वांगे भाजीपाला पिकात (Rabi Crops) शेंडा आणि फळ पोखरणाऱ्या अळीचा प्रादुर्भाव दिसून येत असल्यास प्रादुर्भाव ग्रस्त शेंडे व फळे गोळा करून नष्ट करावेत व त्याच्या व्यवस्थापनासाठी शेतात एकरी 2 कामगंध सापळे लावावेत किंवा क्लोरँट्रानिलीप्रोल 18.5% एससी 4 मिली किंवा क्लोरपायरीफॉस 20% एससी 20 मिली किंवा सायपरमेथ्रीन 10% ईसी 11 मिली प्रति 10 लिटर पाण्यात मिसळून फवारणी करावी.
