हॅलो कृषी ऑनलाईन : प्रधानमंत्री किसान सन्मान निधी योजना काय आहे आणि ती कशी कार्य करते याची माहिती तुम्हा सर्वांना आधीच असेल आणि आत्तापर्यंत बहुतेक शेतकरी बांधवांनी त्याचा लाभ घेतला असेल. या योजने अंतर्गत दहावा हप्ता पात्र शेतकऱ्यांच्या खात्यात जमा झाला आहे. आता शेतकऱ्यांना प्रतीक्षा आहे या योजनेच्या ११ व्या हप्त्याची. मात्र त्याकरिता ई – केवायसी बरोबरच तुमचे आधार कार्ड अपडेट करणे महत्वाचे आहे. आजकाल सर्व महत्त्वाच्या गोष्टींशी आधार कार्ड लिंक केले जात आहे.
ही योजना देशभरातील सर्व लहान आणि अत्यल्प भूधारक शेतकऱ्यांना आर्थिक मदत देण्यासाठी सुरू करण्यात आली होती. योजनेंतर्गत, केंद्र सरकारकडून तीन हप्त्यांमध्ये सर्व शेतकरी कुटुंबांना प्रतिवर्षी 6,000 रुपयांचे उत्पन्न समर्थन दिले जाते.
योजनेचा लाभ का मिळणार नाही
ज्या शेतकरी बांधवांना या योजनेचा लाभ घ्यायचा आहे आणि ते पात्र शेतकरी आहेत, त्यांना त्यांच्या खात्याशी आधार लिंक करावे लागेल. हे तुमच्यासाठी खूप महत्वाचे आहे. जर तुम्ही आत्तापर्यंत तुमचे आधार कार्ड लिंक केले नसेल तर तुम्हाला या योजनेचा लाभ मिळणार नाही. म्हणजेच पी एम किसान योजनेचा अकरावा हप्ता तुम्हाला आधार लिंक नसल्यास मिळू शकणार नाही.
असे करा आधार कार्ड अपडेट
–सर्वप्रथम तुम्हाला www.pmkisan.gov.in या अधिकृत वेबसाइटला भेट द्यावी लागेल.
–होम पेजवर ‘Farmer Corner’ वर क्लिक करा.
–आता ‘Edit Aadhaar Failure Records’ संपादित करा’ हा पर्याय निवडा.
–आता तुम्हाला तेथे आधार कार्ड क्रमांक, मोबाईल क्रमांक, बँक खाते क्रमांक, शेतकरी क्रमांक असे पर्याय दिसतील.
–आधार क्रमांकावर क्लिक करा.
–सर्व आवश्यक माहिती प्रविष्ट करा आणि ‘अपडेट’ वर क्लिक करा.
पीएम किसान मध्ये eKYC कसे अपडेट करावे?
–यासाठी सर्वप्रथम अधिकृत वेबसाइट pmkisan.gov.in वर जा.
–पेजच्या उजव्या बाजूला उपलब्ध असलेल्या eKYC पर्यायावर क्लिक करा.
–आधार कार्ड क्रमांक, कॅप्चा कोड प्रविष्ट करा आणि शोध वर क्लिक करा.
–आधार कार्डशी लिंक केलेला मोबाईल नंबर टाका.
–‘Get OTP’ वर क्लिक करा आणि तुमचा OTP इथे टाका.
या संपूर्ण प्रक्रियेचे अनुसरण करून, तुम्ही तुमचे आधार लिंक करून तुमचे खाते अपडेट करू शकता. प्रविष्ट केलेल्या ओटीपीमध्ये कोणतीही चूक आढळल्यास, ते त्यांचे बायोमेट्रिक्स अद्यतनित करण्यासाठी सीएससी केंद्रांना भेट देऊ शकतात. तसेच, यासंबंधित इतर माहितीसाठी तुम्ही जवळच्या आधार कार्ड केंद्रावर जाऊन माहिती गोळा करू शकता.
