Dr Swaminathan Death : भारताच्या हरितक्रांतीचे जनक एमएस स्वामीनाथन यांचे आज सकाळी चेन्नई येथे ९८ व्या वर्षी निधन झाले. त्यांच्या पश्चात पत्नी आणि तीन मुली आहेत. डॉ. स्वामीनाथन यांच्या कृषी क्षेत्रातील महत्त्वपूर्ण योगदानामुळे भारतात अन्नसुरक्षेत क्रांती झाली. डॉ. स्वामीनाथन यांनी गहू, तांदूळ या धान्याचे अधिकाधिक उत्पन्न देणारे वाण विकसित केले. त्यांनी चेन्नईमध्ये एमएस स्वामिनाथन रिसर्च फाऊंडेशनची स्थापना केली होती.
1972 ते 1979 दरम्यान, डॉ. स्वामीनाथन यांनी भारतीय कृषी संशोधन परिषदेचे महासंचालक आणि भारत सरकारच्या कृषी संशोधन आणि शिक्षण विभागाचे सचिव म्हणून काम केले. त्यांच्या उल्लेखनीय योगदानामुळे त्यांना अनेक प्रतिष्ठित पुरस्कार मिळाले, ज्यात 1971 मध्ये रेमन मॅगसेसे पुरस्कार आणि 1987 मध्ये जागतिक अन्न पुरस्कार यांचा समावेश आहे. त्यांना 1967 मध्ये पद्मश्री, 1972 मध्ये पद्मभूषण आणि 1989 मध्ये पद्मविभूषणने सन्मानित करण्यात आले.
विशेष म्हणजे, राष्ट्रीय शेतकरी आयोगाचे अध्यक्ष या नात्याने डॉ. स्वामीनाथन यांनी शेतकर्‍यांच्या अडचणी दूर करण्यात महत्त्वपूर्ण भूमिका बजावली. 2007 ते 2013 दरम्यान त्यांना राज्यसभेवर खासदार म्हणून नामांकन मिळाले होते.
