हेलो कृषी ऑनलाईन : पुण्यश्लोक अहिल्यादेवी महाराष्ट्र मेंढी व शेळी विकास महामंडळाच्या (Mahamesh Scheme) वतीने भटक्या जमाती- क प्रवर्गातील धनगर व तत्सम जमातीकरिता मुंबई व मुंबई उपनगर हे जिल्हे वगळता उर्वरित ३४ जिल्हातील भज-क प्रवर्गातील 18 ते 60 वयोगटातील लाभार्थीसाठी राजे यशवंतराव होळकर महामेष योजनेचे ऑनलाईन अर्ज दि. २६ सप्टेंबर पर्यंत मागविण्यात येत आहेत.
महामेष योजनेच्या (Mahamesh Scheme) बाबी
- राजे यशवंतराव होळकर महामेष योजने (Mahamesh Scheme) अंतर्गत स्थायी आणि स्थलांतरित पद्धतीने मेंढीपालनासाठी पायाभूत सोई-सुविधेसह 20 मेंढया 1 मेंढानर अशा मेंढीगटाचे 75 % अनुदानावर वाटप.
- सुधारित प्रजातींच्या नर मेंढ्यांचे 75 % अनुदानावर वाटप.
- मेंढी पालनासाठी पायाभूत सोई-सुविधा उपलब्ध करून देण्यासाठी 75 % अनुदान.
- मेंढी पालनासाठी संतुलित खाद्य उपलब्ध करून देण्यासाठी 75 % अनुदान.
- हिरव्या चाऱ्याचा मुरघास करण्याकरिता गासड्या बांधण्याचे यंत्र खरेदी करण्यासाठी 50 % अनुदान.
- पशुखाद्य कारखाने उभारण्यासाठी 50 % अनुदान देण्यात येणारं आहे.
- ज्या मेंढपाळ कुटुंबाकडे किमान 20 मेंढ्या व 1 मेंढानर एवढे पशुधन आहे, अशा कुटुंबांना माहे जून ते सप्टेंबर या चार महिन्याच्या कालावधीसाठी प्रतिमाह रु. 6 हजार प्रमाणे एकूण 24 हजार चराई अनुदान वाटप.
- चार आठवडे वयाच्या सुधारित देशी प्रजातीच्या 100 कुक्कुट पक्ष्यांच्या खरेदी व संगोपना साठी कमाल रु. ९ हजार रुपयांच्या मर्यादेत 75 % अनुदान देण्यात येणार आहे.
- राज्यातील भुमिहीन मेंढपाळ कुटुंबातील कोणत्याही एका सदस्यास अर्ध बंदिस्त, बंदिस्त मेंढी-शेळी पालनाकरिता जागा खरेदी करण्यासाठी जागेच्या किंमतीच्या 75 % (अधिकतम रु. 50,000/-) अथवा किमान 30 वर्षासाठी भाडेकरारावर जागा घेण्यासाठी भाडयापोटी द्यावयाच्या रक्कमेच्या 75 % रक्कम एकवेळेचे एकरकमी अर्थसहाय्य म्हणुन कमाल रु. 50,000/- एवढे अनुदान मेंढी-शेळी पालनासाठी जागा खरेदीसाठी अनुदान.
अर्ज कसा करावा
या योजनेकरिता अर्ज (www.mahamesh.org) या संकेतस्थळावर करावा. तसेच अधिक माहितीसाठी जिल्हा पशुसंवर्धन उपायुक्त व जिल्हा पशुसंवर्धन अधिकारी (जिल्हा परिषद) कार्यालयात संपर्क करण्याचे आवाहन करण्यात आले आहे.
