हॅलो कृषी ऑनलाईन: महाराष्ट्र राज्य कृषी पणन मंडळाकडून (Maharashtra State Board of Agriculture Marketing) फळ व धान्य महोत्सव अनुदान योजना (Fruit and Grain Festival Subsidy Scheme) याद्वारा विविध फळे व धान्ये यांचे महोत्सव भरविण्यासाठी वेगवेगळ्या संस्थांना अनुदान देण्यात येते. याबद्दल सविस्तर माहिती जाणून घेऊ या.
योजनेचा उद्देश (Purpose of the Scheme)
- थेट उत्पादकांकडून ग्राहकांपर्यंत फळे आणि धान्य विक्रीसाठी महोत्सव आयोजित करणे.
- शेतकर्‍यांना त्यांच्या उत्पादनाला चांगला दर मिळवून देणे.
- ग्राहकांना चांगल्या दर्जाची आणि ताजी फळे आणि धान्य उपलब्ध करून देणे.
योजनेचे लाभार्थी
- राज्यातील कृषी उत्पन्न बाजार समित्या
- कृषी व पणनशी संबंधित असलेल्या सहकारी संस्था शासनाचे विभाग
- शेतकरी उत्पादक कंपन्या
- पब्लिक चॅरिटेबल ट्रस्ट व अधिनियम १८६० अंतर्गत नोंदणीकृत संस्था
नियम व अटी (Fruit and Grain Festival Subsidy Scheme)
- महोत्सवाचा कालावधी हा किमान 5 (पाच) दिवसांचा असावा.
- महोत्सवास प्रति स्टॉल रू.2000 /- प्रमाणे अर्थसहाय्य देय राहील.
- महोत्सवामध्ये किमान 10 व कमाल 50 स्टॉलसाठी अर्थसहाय्य देय राहील.
- महोत्सवासाठी जास्तीत जास्त रू 1.00 लाख अनुदान देय राहील.
- फळ व धान्य महोत्सव आयोजनासाठी लाभार्थीस एका आर्थिक वर्षात एकदाच अनुदान देय राहील.
- महोत्सवाच्या प्रचार व प्रसिध्दीमध्ये उदा.बॅनर्स ,जाहिरात,बातम्या,बॅकड्रॉप,हँन्डबील,इ. मध्ये कृषी पणन मंडळाचा सह प्रायोजक म्हणून नामोल्लेख करणे आयोजकांवर बंधनकारक राहील.
- कृषी पणन मंडळास महोत्सवामध्ये स्टॉल घ्यायचा झाल्यास त्यासाठी आवश्यक स्टॉलची मोफत उपलब्धता करून देणे आयोजकांवर बंधनकारक राहील.
- महोत्सवाचा अहवाल व काही निवडक फोटो कृषी पणन मंडळाच्या ‘कृषि पणन मित्र’ मासिकामध्ये प्रकाशित करण्यासाठी पणन मंडळाकडे सादर करावेत.
- महोत्सवातील प्रत,दर व इतर अनुषंगिक व कायदेशीर बाबींसाठी कृषी पणन मंडळ जबाबदार राहणार नाही. तथापी चांगल्या गुणवत्तेचाच माल विकणे स्टॉल धारकांवर बंधनकारक राहील. याची खातरजमा करणे आयोजकांवर राहील.
- महोत्सव आयोजनासाठीचा परिपूर्ण प्रस्ताव कृषी पणन मंडळाच्या विभागीय कार्यालयाच्या शिफारशीसह सादर करणे आवश्यक आहे.
- महोत्सव हा फक्त उत्पादकांकरिता असल्याने त्यामध्ये व्यापा-यांना सहभागी होता येणार नाही किंवा मार्केटमधून आणून मालाची विक्री करता येणार नाही. असे आढळून आल्यास अनुदानासाठी अपात्र ठरविले जाईल.
- महोत्सवाकरिता इतर कोणत्याही शासकिय योजने अंतर्गत अनुदान घेतल्यास या योजने अंतर्गत अनुदान देय होणार नाही.
वर नमूद केलेल्या सर्व अटी व शर्ती मान्य असल्या बाबतचे हमी पत्र रू 100 /- च्या स्टँप पेपरवरती लिहून देणे बंधनकारक आहे.
राज्यातील कृषी उत्पन्न बाजार समित्यांना एका आर्थिक वर्षात जास्तीत जास्त पाच वेळा महोत्सवाचे (Fruit and Grain Festival Subsidy Scheme) आयोजन करण्यास तसे सर्व महोत्सवांचे मिळून 50 स्टॉलसाठी (प्रति महोत्सव कमीत कमी 10 स्टॉल) प्रति स्टॉल रू. 2000 प्रमाणे कमाल अनुदान रू 1.00 लाख असेल.
महोत्सव आयोजन करणेसाठी अग्निशमन विभागाचे ना हरकत प्रमाणपत्र (Fire NOC) घेणे बंधनकारक राहील.
अधिक माहितीसाठी खालील वेबसाईटला भेट द्या (Fruit and Grain Festival Subsidy Scheme)
महाराष्ट्र राज्य कृषी पणन मंडळाची वेबसाइट: https://www.msamb.com/
