हॅलो कृषी ऑनलाईन : केंद्रीय कृषी आणि शेतकरी कल्याण मंत्रालयाने वर्ष २०२३-२४ साठी प्रमुख कृषी उत्पादनांचा (Agriculture Production) तिसरा आगाऊ अंदाज जाहीर केला आहे. ज्यात यावर्षी देशातील एकूण अन्नधान्य उत्पादन ३२८८.५२ लाख टन होईल, असा अंदाज व्यक्त करण्यात आला आहे. हे उत्पादन, वर्ष २०२२-२३ मधील धान्य उत्पादनापेक्षा किंचित कमी आहे. दरम्यान, गेल्या ५ वर्षांत (वर्ष २०१८-१९ ते २०२२-२३ मध्ये) झालेल्या ३०७७.५२ लाख टन सरासरी अन्नधान्य उत्पादनापेक्षा (Agriculture Production) यावर्षी २११.०० लाख टन अधिक धान्य उत्पादन होणार आहे.
तिन्ही हंगामाचा समावेश (Agriculture Production In India)
गेल्या कृषी वर्षापासून, उन्हाळी हंगाम रब्बी हंगामापासून विलग करण्यात आला असून, तो तिसऱ्या आगाऊ अंदाजामध्ये समाविष्ट करण्यात आला आहे. म्हणून, लागवडीखालील क्षेत्र, उत्पादन आणि उत्पन्नाच्या या आगाऊ अंदाजामध्ये खरीप, रबी आणि उन्हाळी या तिन्ही हंगामाचा (Agriculture Production) समावेश करण्यात आला आहे. प्रामुख्याने राज्य कृषी सांख्यिकी अधिकाऱ्यांकडून (एसएएसएएस) मिळालेल्या माहितीच्या आधारावर हा अंदाज तयार करण्यात आला आहे.
पीकनिहाय उत्पादनाचा अंदाज
देशातील एकूण अन्नधान्य उत्पादनातील ३२८८.५२ लाख टनांमध्ये तांदूळ – १३६७.०० लाख टन, गहू – ११२९.२५ लाख टन, मका – ३५६.७३ लाख टन, श्री अन्न १७४.०८ लाख टन, तूर – ३३.८५ लाख टन, हरभरा – ११५.७६ लाख टन आणि एकूण तेलबिया – ३९५.९३ लाख टन यात सोयाबीन – १३०.५४ लाख टन, रेपसीड आणि मोहरी – १३१.६१ लाख टन, ऊस – ४४२५.५२ लाख टन, कापूस – ३२५.२२ लाख गासड्या (प्रत्येकी १७० किलो) आणि ताग – ९२.५९ लाख गासड्या (प्रत्येकी १८० किलो) इतके उत्पादन नोंदवले जाण्याची शक्यता आहे.
या आधारे अंदाज जाहीर
खरीपातीलपीक उत्पादनाचे अंदाज तयार करताना, पीक कापणी प्रयोगांवर (सीसीईएस) आधारित उत्पन्न देखील विचारात घेतले आहे. आधीच्या अंदाजांसह, वर्ष २०२३-२४ च्या तिसऱ्या आगाऊ अंदाजाचे तपशील upag.gov.in येथे उपलब्ध आहेत. याशिवाय हा अंदाज तयार करताना, वातावरणाची स्थिती, पूर्वीचे कल, दरातील चढ-उतार, बाजार समित्यांमध्ये कृषी उत्पादनांची आवक इत्यादी घटक देखील विचारात घेण्यात आले आहे.
