हॅलो कृषी ऑनलाईन : उसाप्रमाणे दूधलाही एफ.आर.पी. (FRP) मिळावी अशी मागणी मध्यंतरी महाराष्ट्रात जोर धरू लागली होती. आता या प्रश्नासह दूध संदर्भांतल्या इतर प्रश्नावर देशस्तरावर संघर्ष आणि संघटन उभारण्याचा निर्णय केरळ येथील कन्नूरमध्ये संपन्न झालेल्या शेतकरी नेते आणि कार्यकर्त्यांच्या राष्ट्रीय बैठकीमध्ये घेण्यात आला आहे. ही बैठक ९ एप्रिल रोजी कन्नूर येथे संपन्न झाली. या बैठकीला अखिल भारतीय किसान सभेचे राष्ट्रीय अध्यक्ष डॉ. अशोक ढवळे व सरचिटणीस हन्नन मोल्ला यांच्या सहकार्याने देशस्तरावरील सर्व प्रमुख दूध उत्पादक राज्यांच्या प्रतिनिधी उपस्थित होते.
काय आहेत प्रमुख मागण्या
–उसाप्रमाणे दुधाला एफ.आर.पी. (FRP) चे संरक्षण मिळावे.
–दूध आणि दुग्ध पदार्थांच्या निर्मितीमध्ये तयार होणाऱ्या नफ्यात शेतकरी कुटुंबांना रास्त वाटा मिळावा.
— दूध क्षेत्राला रेव्हेन्यू शेअरींगचे धोरण लागू करावे.
दूध उत्पादक शेतकरी संघर्ष समिती स्थापन करून आंदोलनाच्या माध्यमातून दूध उत्पादकांना न्याय मिळवून देण्याचा प्रयत्न महाराष्ट्रात गेले चार वर्ष सुरू आहे. आता याच स्वरूपाचे प्रयत्न देशपातळीवर सुरु झाले आहेत. सर्व दूध उत्पादक राज्यांमधील प्रमुख शेतकरी नेत्यांची दोन दिवसांची कार्यशाळा दिनांक 14 व 15 मे 2022 रोजी केरळ येथे घेऊन या माध्यमातून देशस्तरावर दूध उत्पादकांची भक्कम संघटना उभी करण्याचा निर्णय या बैठकीमध्ये घेण्यात आला.
दूध उत्पादकांना उत्पादनखर्चावर आधारित दर मिळवून देण्यासाठी सुसंघटित प्रयत्न करण्याच्या दिशेने या बैठकीमुळे महत्त्वाचे पाऊल पडले आहे.
