हॅलो कृषी ऑनलाईन : राज्यातील हवामानात मोठा बदल (Weather Update) पाहायला मिळत आहे. बंगालच्या उपसागरात तयार झालेल्या कमी दाब क्षेत्रामुळे राज्याच्या पूर्व भागामध्ये पावसाचे वातावरण असून, गेले दोन दिवस विदर्भ आणि मराठवाड्यातील जिल्ह्यांमध्ये पावसाने जोरदार हजेरी लावली आहे. शनिवारी झालेल्या पावसानंतर रविवारी (ता. 17) अनेक भागांमध्ये अवकाळी पावसासह गारपीट झाली आहे. ज्यामुळे शेतातील पिकांसह फळबागांचे मोठे नुकसान झाले आहे. अशातच सोमवार आणि मंगळवार असे दोन दिवस संपूर्ण विदर्भ आणि मराठवाड्यातील काही जिल्ह्यांमध्ये जोरदार पावसाची (Weather Update) शक्यता असल्याचे हवामान विभागाने म्हटले आहे.
कमी दाब क्षेत्र कार्यरत (Weather Update Today 18 March 2024)
सध्याच्या घडीला बंगालच्या उपसागरात सौम्य कमी दाब क्षेत्र (Weather Update) कार्यरत आहे. प्रामुख्याने पश्चिम बंगालच्या किनापट्टीपासून दक्षिणेकडे तामिळनाडूपर्यंत हा कमी दाब पट्टा कार्यरत आहे. यामध्ये झारखंड, आंध्रप्रदेश, महाराष्ट्रातील विदर्भ मराठवाड्याचा भाग, याशिवाय मध्यप्रदेशचा काही भाग, दक्षिणेकडे कर्नाटक भागापर्यंत चक्राकार वारे वाहून येत आहे. जे आपल्यासोबत आर्द्रतायुक्त बाष्प वाहून आणत आहे. ज्यामुळे सध्या राज्यातील पूर्व भागामध्ये पाऊस पाहायला मिळत आहे. असेही हवामान विभागाने आपल्या अंदाजात म्हटले आहे.
‘या’ जिल्ह्यांना इशारा
दरम्यान, हवामान विभागाने वर्तवलेल्या अंदाजानुसार आज (ता. 18) राज्यातील प्रामुख्याने गोंदिया, चंद्रपूर या दोन जिल्ह्यांमध्ये वादळी वाऱ्यासह गारपीट होण्याची शक्यता आहे. तर अमरावती, यवतमाळ, वर्धा, नागपूर, भंडारा, गडचिरोली या जिल्ह्यांमध्ये वादळी वाऱ्यासह पाऊस होऊ शकतो. तर मराठवाड्यातील काही जिल्ह्यांमध्ये देखील भाग बदलत आज पाऊस होण्याची शक्यता आहे. असेही हवामान विभागाने आपल्या अंदाजात म्हटले आहे.
तापमानातील वाढ कायम
याउलट राज्यातील काही भागांमध्ये पाऊस पडत तर काही भागांमध्ये सूर्य आग ओकत असल्याचे पाहायला मिळत आहे. मागील 24 तासांमध्ये सोलापूर या ठिकाणी 40.2 अंश सेल्सिअस इतके उच्चांकी तापमान नोंदवले गेले आहे. याशिवाय पश्चिम-दक्षिण महाराष्ट्रातील अन्य जिल्ह्यांमध्येही तापमानाचा पारा उच्चांकी पातळीवर कायम आहे. तर पूर्वेकडील विदर्भातील सर्वच जिल्ह्यांमध्ये तापमान 35 अंशांहून अधिक आहे. ज्यामुळे सध्या पाऊस पडून गेल्यानंतर काही भागांमध्ये हवेत काहीसा गारवा निर्माण झाल्याचे पाहायला आहे.
