हॅलो कृषी ऑनलाईन : अवकाळी पाऊस (Weather Update) महाराष्ट्रासह देशाची पाठ सोडायला तयार नाहीये. गेले चार ते पाच दिवस राज्यातील अनेक भागांमध्ये पावसाच्या सरी बरसल्यानंतर सध्या राज्यातील ढगाळ वातावरण काहीसे निवळले आहे. अशातच आता काहीशी विश्रांती घेत पुन्हा एकदा 7 एप्रिलनंतर राज्यात दोन ते तीन दिवस ढगाळ वातावरणासह पावसाचे वातावरण सक्रिय होण्याची शक्यता आहे. प्रामुख्याने बंगालच्या उपसागरातील चक्रीय वाऱ्यांच्या स्थितीमुळे राज्यातील विदर्भ आणि मराठवाड्यात हा पाऊस (Weather Update) होऊ शकतो, अशी शक्यता भारतीय हवामानशास्र विभागाने (आयएमडी) व्यक्त केली आहे.
‘या’ राज्यांमध्ये पावसाची शक्यता कायम (Weather Update Today 31 March 2024)
पुढील चार ते पाच दिवस राज्यात पावसाची फारशी शक्यता नसली. तरी देशातील अनेक भागांमध्ये पावसाचे वातावरण (Weather Update) मात्र कायम आहे. त्यामुळे आज उत्तरेकडील पंजाब, हरियाणा, जम्मू-काश्मीर, छत्तीसगड, झारखंड, पश्चिम बंगाल आणि ईशान्येकडील राज्यांमध्ये पावसाची शक्यता कायम असल्याचे हवामान विभागाने म्हटले आहे. 3 एप्रिलनंतर देशातील पावसाचे वातावरण काहीसे निवळण्याची चिन्हे आहेत. असेही भारतीय हवामानशास्र विभागाने आपल्या अंदाजात म्हटले आहे. 7 एप्रिलनंतर महाराष्ट्रात पावसाचे वातावरण तयार होणार असले तरी देशपातळीवर मात्र अन्य राज्यांमध्ये हवामान कोरडे राहण्याची शक्यता अधिक आहे, अशी शक्यताही हवामान विभागाकडून व्यक्त करण्यात आली आहे.
राज्यात उकाडा वाढला
राज्यात ढगाळ वातावरण असल्याने अनेक भागांमध्ये उकाडा कायम आहे. प्रामुख्याने विदर्भातील जिल्ह्यांमध्ये उच्चांकी तापमान (Weather Update) पाहायला मिळत आहे. मागील 24 तासांमध्ये राज्यातील अकोला या ठिकाणी उच्चांकी 42.6 अंश सेल्सिअस तापमानाची नोंद झाली आहे. तर विदर्भातील जिल्ह्यांमध्ये सध्या उष्णतेची लाट कायम असून, अनेक जिल्ह्यांमध्ये सध्या तापमानाचा पारा 40 अंशाहून अधिक नोंदवला गेला आहे. विदर्भात प्रामुख्याने नागपूर, वर्धा, यवतमाळ, चंद्रपूर, वाशीम, अमरावती, अकोला या जिल्ह्यांमध्ये तापमान 40 अंशांहून अधिक आहे. तर मराठवाड्यातील परभणी, बीड, या जिल्ह्यांसह दक्षिण महाराष्ट्रातील सोलापूर या जिल्ह्यात तापमान 40 अंशांहून अधिक नोंदवले गेले आहे.
